Канон
святителям Василию Великому, Григорию Богослову и Иоанну Златоустому
Минея, 30 Января, Кано́н
Глас 2
Песнь 1
Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.
Припев: Святи́телие Христо́ви, моли́те Бо́га о на́с.
Ко́е благодаре́ние, ко́е противовоздая́ние, подоба́ющее на́шим, челове́цы, принесе́тся от на́с благоде́телем, и́миже ко е́же до́бре бы́ти наставля́емся?
Припев: Святи́телие Христо́ви, моли́те Бо́га о на́с.
Вити́йстии язы́цы, и хи́трости, и кова́рства, и вся́ слове́с си́ла ны́не в вину́ да сподви́гнутся еди́ну и, честву́юще взаи́м, да почту́т.
Сла́ва Отцу́ и Сы́ну и Свято́му Ду́ху.
Сво́йственнаго у́бо и́м не терпя́ху, дабы́ что́ стяжа́ти на земли́, небому́дреннии, храни́телие же яви́шася о́бщества и предста́телие, о́бщих у́бо и похва́л да сподо́бятся.
И ны́не и при́сно и во ве́ки веко́в. Ами́нь.
Богородичен: Тя́, о́бщее любоче́стие, Всенепоро́чная, на́шего естества́, вси́ сла́вим, уста́ еди́ны бы́вше и еди́но согла́сие соверши́вше.
Песнь 3
Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Припев: Святи́телие Христо́ви, моли́те Бо́га о на́с.
Труба́ вели́кая Це́ркве, свети́льник, просвеща́яй вселе́нную, пропове́дник, веща́нием объе́мляй вся́ концы́, великоимени́тый Васи́лий сподвиза́ет собра́ние сие́.
Припев: Святи́телие Христо́ви, моли́те Бо́га о на́с.
Све́тел от жития́ и веще́й, све́тел от слове́с и уче́ний, во все́х пресиява́я па́че все́х, я́коже друго́е па́че зве́зд со́лнце, многопе́тый Богосло́в дне́сь блажи́тся.
Сла́ва Отцу́ и Сы́ну и Свято́му Ду́ху.
Се́ све́т ми́ра ми́ру све́тит, се́ земли́ со́ль зе́млю услажда́ет, се́ дре́во жи́зни безсме́ртия плоды́ предлага́ет, Златоу́стый святы́й. И́же умре́ти не хотя́щии, прииди́те, наслажда́йтеся.
И ны́не и при́сно и во ве́ки веко́в. Ами́нь.
Богородичен: Вся́ от небытия́ в бытие́ Сотвори́вый и естество́ Да́вый коему́ждо бы́вших, То́йже и да́нная естества́ прелага́ти ве́сть, я́коже хо́щет. Отону́дуже и слы́шимо е́сть, я́ко и Де́ва ро́ждши, — кто́ не удиви́тся?
Седален, глас 8
Вели́кия свети́льники светоза́рныя, Це́ркве столпы́ неразори́мыя согла́сно да восхва́лим, и́же до́брых наслажда́ющиися и слове́с те́х, ку́пно и благода́ти: прему́драго Златоглаго́лива и Вели́каго Васи́лия с Григо́рием све́тлым Богосло́вом. К ни́мже и возопии́м, от се́рдца зову́ще: святи́телие тревелича́йшии, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Ду́шу мою́, Де́во, смире́нную, бу́рею жития́ искуше́ний ны́не я́ко кроме́ управле́ния бы́вшую, потопля́емую волна́ми, грехо́в бре́менем я́вльшуся преиспо́лнену и во дно́ а́дово приити́ бе́дствующу, предвари́, Богоро́дице, моли́тв Твои́х ми́лостию, тишину́ подаю́щи и бе́д изыма́ющи. Приста́нище бо Ты́ еси́ небу́рное, моля́щися Сы́ну Твоему́ и Бо́гу прегреше́ний оставле́ние дарова́ти ми́: Тя́ бо и́мам наде́жду, недосто́йный ра́б Тво́й.
Песнь 4
Ирмос: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.
Припев: Святи́телие Христо́ви, моли́те Бо́га о на́с.
Разу́мливы от ни́жния му́дрости бы́вше, правле́ние, пресла́внии, от Боже́ственныя стяжа́сте, те́мже, я́ко рабы́ню, сию́ о́ной всему́дре покори́сте.
Сла́ва Отцу́ и Сы́ну и Свято́му Ду́ху.
Любому́дрии, му́дрыя а́ще лю́бите, умудри́теся и глаго́лати научи́теся вси́, и́же словесе́м чудя́щиися, дея́ния опа́сству и виде́ния отту́ду обуча́ющеся.
И ны́не и при́сно и во ве́ки веко́в. Ами́нь.
Богородичен: Я́ко по́зден до́ждь, напоследи́ бы́вый, у́тренний, во́д и веко́в Соде́тель, во чре́во Твое́ ука́нув, Всенепоро́чная, во вре́мя прохлажда́яй оскудева́ющия.
Песнь 5
Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.
Припев: Святи́телие Христо́ви, моли́те Бо́га о на́с.
Ты́ исто́чник Твои́х дарова́ний испи́ти весьма́, Человеколю́бче, да́л еси́ святы́м, ума́лен ника́коже истоща́нием, ми́р же ве́сь упои́в и́же от чре́ва и́х боже́ственными пото́ки.
Припев: Святи́телие Христо́ви, моли́те Бо́га о на́с.
Что́ ми зла́то? Что́ ми бога́тство, и сла́ва, и могу́тство? Ды́мове, расходя́щиися по возду́ху: вся́ да исче́знут, вся́ да прено́сит ве́тр. Мне́ бога́тство еди́но многорачи́тельно — учи́телей тро́ица вити́йствующая.
Сла́ва Отцу́ и Сы́ну и Свято́му Ду́ху.
То́чит река́ нетле́нную пи́щу и Боже́ственное питие́, то́чит а́лчущим безсме́ртное бра́шно и жа́ждущим нетле́нное питие́, вода́ жива́ во ве́ки и содержа́щая жи́вы пию́щия: вси́ многотеку́щия жи́зни насы́титеся.
И ны́не и при́сно и во ве́ки веко́в. Ами́нь.
Богородичен: Име́яше кре́пость на ны́ зло́ба, но не в коне́ц: изнемо́же бо по Де́ве, в кре́пости Си́льнаго ро́ждшей, подъе́мшаго плотску́ю не́мощь и си́льнаго в зло́бе умертви́вша.
Песнь 6
Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́.
Припев: Святи́телие Христо́ви, моли́те Бо́га о на́с.
Сво́йства в Тро́ице три́ сбогосло́вите: нерожде́ние Отца́, Сло́ва же рожде́ние и Ду́ха исхожде́ние Сама́го.
Припев: Святи́телие Христо́ви, моли́те Бо́га о на́с.
Дне́сь до́му сему́ светоявле́нное спасе́ние: два́ бо и три́ со́бранныя Христо́с, во и́мя Свое́ почеству́яй, посреде́ прису́тствует си́х.
Сла́ва Отцу́ и Сы́ну и Свято́му Ду́ху.
Неиспы́танна земна́я глубина́ к небе́сной высоте́, но от земли́ святы́я вознесе́ вы́шше небе́с небе́сное жела́ние.
И ны́не и при́сно и во ве́ки веко́в. Ами́нь.
Богородичен: Но́в Тя́ исто́чник, Де́во, и вину́ та́ин иму́ще, трие́ богоглаго́льницы но́выми предложе́ньми новоле́пное прили́чествует нарече́ние.
Кондак, глас 2
Свяще́нныя и боговеща́нныя пропове́дники, ве́рх учи́телей, Го́споди, прия́л еси́ в наслажде́ние благи́х Твои́х и упокое́ние: труды́ бо о́нех и сме́рть прия́л еси́ па́че вся́каго всепло́дия, Еди́не, прославля́яй святы́я Твоя́.
Икос
Кто́ дово́лен своя́ устне́ разве́рзти и подви́гнути язы́к к ды́шущим огне́м си́лою Сло́ва и Ду́ха? Оба́че толи́ко рещи́ дерзну́: я́ко все́ преидо́ша челове́ческое естество́ си́и трие́ мно́гими и вели́кими дарова́ньми, дея́нием же и виде́нием, по обоему́ све́тлы превозше́дше. Те́мже зело́ вели́ких даро́в ты́я сподо́бил еси́, я́ко ве́рныя Твоя́ служи́тели, Еди́не, прославля́яй святы́я Твоя́.
Песнь 7
Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.
Припев: Святи́телие Христо́ви, моли́те Бо́га о на́с.
Побежда́ется, блаже́ннии, и отбега́ет я́же пре́жде непостоя́нная де́рзость ересе́й: во́ск же, растаява́емый от лица́ огня́, любоде́ичное же вся́кое уче́ние показу́ется, ва́шим приража́ющееся огнедохнове́нным веща́нием.
Сла́ва Отцу́ и Сы́ну и Свято́му Ду́ху.
Лжи́вых у́бо уклони́шася е́ллинских буесло́вий, увеще́ние же томи́тельство, е́же в челове́цех, еди́но избра́ша, под ни́мже и́стину си́и трие́ утверди́вше, си́це ве́сь со́нм ве́рных побежда́ют словесы́ и увещева́ют.
И ны́не и при́сно и во ве́ки веко́в. Ами́нь.
Богородичен: В Тебе́ вся́ко прорече́ние воспочи́ и коне́ц прия́ше удивля́ющее глаго́лющия: из Тебе́ же светле́е и прорече́ний чудеса́ то́чат, Чи́стая, му́дрыя явля́юща сказа́тели.
Песнь 8
Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припев: Святи́телие Христо́ви, моли́те Бо́га о на́с.
Разумева́ем благоче́стно и прославля́ем единоче́стно Еди́но Естество́, безмерномо́щную Еди́ницу же и Тро́ицу, вся́ сия́ словесы́ пра́вящую лу́чшими. Та́ко бо сла́вити трие́ богоно́снии преда́ша, с ни́миже покланя́емся Ей во ве́ки.
Сла́ва Отцу́ и Сы́ну и Свято́му Ду́ху.
Соедини́шася трие́ богопропове́дницы, соедини́вшии Тро́ицу и Неразде́льное во все́х соблю́дшии, Боже́ственным естество́м: еди́ну от Тоя́ восприя́ша неразде́льную сла́ву, в похвале́ние еди́но созыва́ющую превознося́щия Ю во ве́ки.
И ны́не и при́сно и во ве́ки веко́в. Ами́нь.
Богородичен: Прие́м, е́же по на́м, возда́в же Свое́ Благоде́тель, соде́я то́кмо, не пострада́ же, Де́во: твори́т бо, но не в тле́ние устроя́ет, па́че же и стражда́ во́лею, стра́стию стра́сти реши́т, я́коже трие́ отцы́ на́с тайноуча́т.
Песнь 9
Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.
Припев: Святи́телие Христо́ви, моли́те Бо́га о на́с.
Се́ ва́ше де́лание и па́ства, за ю́же велича́йшия боле́зни претерпе́сте, во еди́но соше́дшеся, ку́пно же три́ вы́ соприе́мше, о́бщую и́мать похвалу́ ва́ше сладча́йшее соедине́ние.
Припев: Святи́телие Христо́ви, моли́те Бо́га о на́с.
Не обоюдоо́стрый ме́чь благода́ть, но трео́стрый на ра́тников тоя́ предлага́ет: еди́н небокова́нен ме́чь, треми́ крепостьми́ изощре́н, при́сно побо́рствуяй по Трисия́нном Еди́ном Божестве́.
Припев: Святи́телие Христо́ви, моли́те Бо́га о на́с.
Ва́ше жи́тельство на небесе́х бя́ше, пресла́внии, и пло́ть нося́щих во ве́ки нескве́рну, в ни́хже всесоверше́нне ны́не живу́ще, су́щим на земли́ на́м пребыва́ющим вы́шняя моли́те и мы́слити, и де́яти.
Припев: Святи́телие Христо́ви, моли́те Бо́га о на́с.
Богородичен: Тесни́т мя́ широта́ Твои́х вели́чий, Влады́чице, подавля́ющи сло́во от ча́стости, и пресла́вно ми́ случа́ется е́же недоумева́тися от благомо́щества, те́мже толи́ко Тя́ Возвели́чившаго сла́вим.
Светилен
Три́ светоза́рныя свети́льники, па́че со́лнечных лу́чь от Светонача́льныя Тро́ицы и Трисо́лнечныя Еди́ницы, преесте́ственно сме́шены, богоно́сныя восхва́лим отцы́.
Сла́ва Отцу́ и Сы́ну и Свято́му Ду́ху.
Све́та прия́телища, светолу́чныя мо́лнии, Васи́лия ны́не Вели́каго, Григо́рия Богосло́ва, Златоу́стаго Иоа́нна, да восхва́лим вси́.
И ны́не и при́сно и во ве́ки веко́в. Ами́нь.
Богородичен: Еди́нственное Божество́, О́тче, Сы́не и Ду́ше, мольба́ми Васи́лия, Григо́рия и Иоа́нна и Пречи́стыя Богоро́дицы да не отлучу́ся Твоея́ сла́вы.
Акафист
трем Святителям: Василию Великому, Григорию Богослову и Иоанну Златоусту
Конда́к 1
Избраннии светильницы Церкви Христовы, Василие, Григорие и Иоанне, ученьми вашими мир просветившии и вся шатания ересей и хульных смущения угасившии; яко ходатаи спасения нашего суще, молитвами вашими сохраните ны от всяких бед и вечных мук, да с радостию благодаряще вопием вам:
Радуйтеся, трие святителие, велицыи и вселенстии учителие.
Икос 1
Ангели земнии и человецы Небеснии, святителие Христовы и отцы треблаженнии, поборницы Живоначальныя Троицы, от Нея светом трисолнечным осияваемии и молящиися непрестанно у престола Триипостаснаго Божества о душах наших, услышите ны от сердца к вам взывающия:
Радуйтеся, имущии дерзновение вопити о нас ко Господу;
радуйтеся, велицыи угодницы Святыя Троицы.
Радуйтеся, дарованьми единочестнии;
радуйтеся, апостолом единонравнии.
Радуйтеся, яко вашими ученьми дивно просия благодать Христова;
радуйтеся, разум свой в послушание веры пленившии.
Радуйтеся, блазии делателие винограда Христова;
радуйтеся, от юности Богом благословеннии.
Радуйтеся, скорби жития сего добре претерпевшии и данный вам талант приумножившии;
радуйтеся, волю Божию сильным мира сего со многим дерзновением благовестившии.
Радуйтеся, тьму нечестия отгнавшии;
радуйтеся, всю подсолнечную зарями догматов просветившии.
Радуйтеся, трие святителие, велицыи и вселенстии учителие.
Кондак 2
Видя еретичествуюших лютая стремления, меч острейший противу сетей лжеучений и огнь, плевелы суемудрия поядаяй, святый Василии явися и, яко пастырь изряднейший, обличив лесть идольскую своим богодухновенным вещанием. Научи ны почитати Святую Троицу, разделену убо Ипостасьми, соединену же Существом, и вопити Ей: Аллилуиа.
Икос 2
Разум озарен благодатию Христовою имуще, яко апостолом единонравнии, православных догматов учения уяснисте и трие велицыи светильницы Триипостаснаго Божества явистеся; вашими бо вдохновенными писаньми озаряема, Церковь Христова светло красуется, и верная чада ея в меру возраста исполнения Христова восходят. Темже взирающе на богатство благодати Христовы, вам дарованныя, яко просветители наша восхваляем вы, вопиюще таковая:
Радуйтеся, богоноснии небеснии таинницы;
радуйтеся, покаяния немолчнии проповедницы.
Радуйтеся, сосуди избраннии;
радуйтеся, премудрии учителие вселенныя.
Радуйтеся, в Божественных учениих Христовых люди наставившии;
радуйтеся, в повелениих Господних всегда усердно ходившии.
Радуйтеся, многоразличных добродетелей обряды в вашем житии явившии;
радуйтеся, столпи непоколебимии, веру Христову Божественными догматы утвердившии.
Радуйтеся, словесное стадо Христово мудре упасшии;
радуйтеся, православия изряднейшии богослови.
Радуйтеся, светила, вся концы земли просвещающая;
радуйтеся, свирель и цевнице сладкозвучная.
Радуйтеся, трие святителие, велицыи и вселенстии учителие.
Кондак 3
Сила молений отчих понуди святаго Григория Понт оставити и в Назианз ко отцу своему, помощи ради ему, преселитися, идеже славу Божию ученьми и делы вещаше и ересь арианскую посрамляше. Темже и нас, великий святителю Григорие, Божественнаго рая нетленныя проходя пажити, поминай у престола Святыя Троицы, да со умилением взываем Ей: Аллилуиа.
Икос 3
Имуще в сердцах светоносную благодать Святыя, Единосущныя и Нераздельныя Троицы, трие богопроповедницы, разделеннии телесы и совокупленнии духом, благочестно яве проповедаша Троицу Едину непременную, Существо же и Божество, и сию проповедь страданьми запечатлеша. Темже и мы, подражающе вере их, вопием таковая:
Радуйтеся, сильнии и непреборимии Церкве Христовы споборницы;
радуйтеся, истины Христовы усерднии ревнители.
Радуйтеся, ко Пресвятей Троице молитвенницы теплии;
радуйтеся, Церкве Христовы пастырие добрии.
Радуйтеся, Ариа низложившии и православныя утвердившии;
радуйтеся, Троицу Едину Непременную, Существо и Божество, деяньми и ученьми прославившии.
Радуйтеся, Отца, и Сына, и Святаго Духа, Троицы Ипостаси, дивно уяснившии;
радуйтеся, Трисиятельнаго ради и Единаго Божества величайшия скорби и гонения претерпевшии.
Радуйтеся, тяготу дневную до скончания своего жития неослабно понесшии;
радуйтеся, нощь мрачную злочестивых ересей лучами богомудрых догматов отгнавшии.
Радуйтеся, души верных благодатно напитавшии;
радуйтеся, Царствия Вечнаго наследницы быти сподобившиися.
Радуйтеся, трие святителие, велицыи и вселенстии учителие.
Кондак 4
Бурю ярости и гнева воздвигоша, о Златоусте, безумнии людие, клевещуще на тя и изгнати от царствующего града повелевающе. Ты же, Златослове, на камени веры Христовы непоколебимо пребывая и благодатию Святаго Духа укрепляем, бурю гонений и мучений мужественно претерпел еси и страданьми венец нетленный на Небесех себе уготовал еси, научая всех в терпении нести Крест Христов и взывати Богу: Аллилуиа.
Икос 4
Слышаще богодухновенная словеса ваша, запечатленная многими подвиги и страданьми, жаждущии глаголов жизни вечныя издалеча к вам прихождаху, и нетленную пищу от вас приемше и Божественнаго пития почерпше, взываху вам сицевая:
Радуйтеся, глубины слова Божия добре испытавшии;
радуйтеся, непрестанным рачением Бога взыскавшии.
Радуйтеся, алчущих правды питателие;
радуйтеся, нищих духом утешителие.
Радуйтеся, облацы, источающии росу учений благочестивых и напаяющии вселенную;
радуйтеся, приснотекущия реки духовныя, напаяющия верных чад Церкве Христовы.
Радуйтеся, Божественных Таин хранителие и словесные трубы Божия;
радуйтеся, правыя веры и благочестия христианскаго насадителие.
Радуйтеся, чудесы многими верныя озаряющии;
радуйтеся, реки врачеваний нам проливающии.
Радуйтеся, усердно притекающия к вам от искушений и напастей молитвами вашими охраняющии;
радуйтеся, всего рода христианскаго похвало.
Радуйтеся, трие святителие, велицыи и вселенстии учителие.
Кондак 5
Боготечную звезду Христос миру показа тя, великий во иерарсех Василие; стяжав бо ведение Божественных Таин и озарение свыше от Престола благодати Божия, умы и сердца верных богодухновенными словесы дивно просветил еси, любовию же к Богу одушевляем, гонения и страдания за Христа добре претерпел еси и сего ради сподобился еси на Небесех молитвеннаго дерзновения у Престола Царя Славы, образ быв верным словом, житием, духом, любовию, верою и чистотою, да вси со умилением вопиют Пресвятей Троице: Аллилуиа.
Икос 5
Видяще вас, святителие Христовы, Небесным ликостоянием присно спребывающия и Престолу Божию всегда предстоящия, со умилением воспеваем возвеличившую вас Живоначальную Троицу, Юже словом и житием вашим прославили есте, вам же, молитвенником изряднейшим, от любве сердечныя вопием:
Радуйтеся, горним ликом совокуплении и святых ангел сожителие;
радуйтеся, Престолу Царя славы предстоящии присно со всеми избранными.
Радуйтеся, славою небесною украшеннии;
радуйтеся, плоть и мир возненавидевшии.
Радуйтеся, вся сокровища мира и житейския сласти Христа ради во уметы вменившии;
радуйтеся, на светозарную добродетелей колесницу возшедшии и Небеснаго Царствия достигшии.
Радуйтеся, и нам, грешным, образ добродетелей словом и житием явившии;
радуйтеся, многими скорбьми вшедшии в радость Господа своего.
Радуйтеся, теплии о нас пред Богом ходатаи;
радуйтеся, православнаго богословия светила изряднейшая.
Радуйтеся, веры христианския похвало;
радуйтеся, святителей славо и Церкве украшение.
Радуйтеся, трие святителие, велицыи и вселенстии учителие.
Кондак 6
Проповедуя истину боговещанными твоими глаголы, сокрушил еси, богослове Григорие, еллинская суемудрия и ересей соблазны, вселенней же всей немолчно проповедал еси в Троице славимаго Бога Единосущнаго, Отца и Сына и Духа Святаго, научая всех вопити Ему: Аллилуиа.
Икос 6
Возсиясте светом добродетельнаго жития и православныя веры исповеданием во всю вселенную и всем языком свет истиннаго богопознания уяснисте, якоже быти вам пастырем и учителем всея Церкве Христовы. Темже и по смерти не престаете призирати на ны, тепле вам молящияся и взывающия:
Радуйтеся, три светила великая, путеводящая нас ко спасению;
радуйтеся, просветителие седящих во тьме неведения.
Радуйтеся, недомысленныя Тайны Триипостаснаго Божества нам уясняющии;
радуйтеся, струями мудрых учений паству свою напаяющии.
Радуйтеся, пастырие изряднейшии, житие свое всякими добродетельми благоукрасившии;
радуйтеся, стадо свое от волков хищных соблюдшии.
Радуйтеся, светильницы трисолнечнаго света, умы и сердца верных дивно озаряющии;
радуйтеся, образы целомудрия, ревновати о стяжании сея добродетели нас научающии.
Радуйтеся, церковная кормила, путь православнаго боговедения ясно показующая;
радуйтеся, дванадесяти апостолом единонравнии.
Радуйтеся, ангельских ликов сожителие;
радуйтеся, купно со всеми святыми непрестанно молящиися о нас.
Радуйтеся, трие святителие, велицыи и вселенстии учителие.
Кондак 7
Хотя змий лукавый искусити тя, якоже Иова многострадальнаго, воздвиже бурю злобы нечестивых, изгнавших тя в заточение. Обаче благодатию Христовою укрепляем, всякая злострадания и болезни добре претерпел еси, отче Иоанне Златоусте, и блаженныя кончины сподобился еси. Ныне же пребывая в невечернем дни Царствия Христова, не престай молитися за ны у Престола Триипостаснаго Бога, да со умилением вопием: Аллилуиа.
Икос 7
Новии светильницы светозарнии и Церкве непоколебимии столпи явистеся, святителие велицыи: святостию бо жития вашего, еще во плоти суще на земли, бесте яко безплотни. Сего ради Церковь Христова, присно прославляющи вас, благодарственная пения восписует светодавцу Христу Богу, Егоже благодатию укрепляеми, велия болезни претерпесте и труды понесосте во благовестии Христове. Темже прославляюще Христа, непрестанно благодеющаго Церкви Своей Святей, восхваляем и вас, яко верных слуг Христовых и строителей Таин Божиих, вопиюще сицевая:
Радуйтеся, вернии Троицы поборницы;
радуйтеся, Православия непобедимии исповедницы.
Радуйтеся, иерархов священноначальницы;
радуйтеся, лучами богословия вашего ересей неистовство разрушившии.
Радуйтеся, пресветлии благочестия образи;
радуйтеся, верныя в боговедении утвердившии.
Радуйтеся, слова Божия богодухновеннии изъяснителие;
радуйтеся, Владыки Христа раби блазии и вернии.
Радуйтеся, кротость Моисееву и ревность Илиину в подвизех своих воплотившии;
радуйтеся, терпением скорбей и гонений древнему Иову подражавшии.
Радуйтеся, Иосифа целомудрием и чистотою украшеннии;
радуйтеся, Петрово исповедание и Иоанново богословие показавшии.
Радуйтеся, трие святителие, велицыи и вселенстии учителие.
Кондак 8
Странное чудо благодати дарованныя тебе, святителю Василие, уведе на себе Ефрем Сирианин, егда восхотевшу ему видети тя, отче, послал еси архидиакона своего привести его к тебе, и молитвою твоею Ефрем уразуме язык еллинский и, чудеси дивяся, прослави Бога, поя Ему: Аллилуиа.
Икос 8
Всю веру во Святую Троицу непорочну сохранисте и многи ко Христу приведосте, святителие Христовы, подвигом добрым подвизавшеся. Сего ради, взирающе на дивный подвиг ваш и на чистое житие ваше, со умилением вопием вам таковая:
Радуйтеся, Православия одеждою, свыше истканною, Церковь украсившии;
радуйтеся, еретическая суесловия ясно обличившии.
Радуйтеся, писаньми и словесы вашими духовное сокровище Церкви Христове собравшии;
радуйтеся, мудрость земную и вся красная мира Христа ради отвергшии.
Радуйтеся, сокровищ Небесных паче всего взыскавшии;
радуйтеся, Пастыреначальника Христа, яко служителие вернии, живоносным стопам последовавшии.
Радуйтеся, высокий образ добродетелей в житии вашем явившии;
радуйтеся, душевныя страсти, вкупе же и телесныя, духовным мечем посекшии.
Радуйтеся, Живоначальней Троице в жертву живу, святу и благоугодну себе самих принесшии;
радуйтеся, грешников предстателие.
Радуйтеся, нищих заступницы;
радуйтеся, пастырей учителие и образы.
Радуйтеся, трие святителие, велицыи и вселенстии учителие.
Кондак 9
Всею душею твоею возлюбив Бога, отче Григорие, боговидную чистоту и целомудрие паче всех избрал еси и богослов великий и таинник явился еси. Ныне предстоя Престолу Святыя Троицы, испроси мирови мир, и спасение всем нам, восхваляющим тя и поющим Богу: Аллилуиа.
Икос 9
Витийством богодухновенным триех вселенских святителей еретичестии соблазны престаша, православная же вера паче и паче превозможе. Сего ради от усердия нашего со умилением и любовию взываем к ним таковая:
Радуйтеся, любовию Православия все житие ваше озарившии;
радуйтеся, Единаго Бога в Триех Лицах чествовати научившии.
Радуйтеся, Ариево злочестие и хуления иных еретиков низложившии;
радуйтеся, лжеучителей пребеззаконная уста светлостию словес ваших заградившии.
Радуйтеся, небесныя трубы, проповедавшия мирови Христово Евангелие;
радуйтеся, во иерарсех светила три великая.
Радуйтеся, учителие кротости, воздержания, вкупе же и покаяния;
радуйтеся, монашествующих добрии учителие и наставницы.
Радуйтеся, Церкве ограждение и Православия поборницы;
радуйтеся, в труды Апостолов вшедшии и клас добраго исповедания пожавшии.
Радуйтеся, за веру и подвиги венцы нетленныя от Пастыреначальника Христа приемшии;
радуйтеся, великия труды и подвиги во благоустроении Церкве Христовы подъемшии.
Радуйтеся, трие святителие, велицыи и вселенстии учителие.
Кондак 10
Спаса Христа умоляти не престай о чтущих память твою, всехвальне Иоанне Златоусте: тебе бо дадеся благодать молитися за ны. Темже и мы, яко ко благоуханнаго мира сосуду, точащему исцеления всем с верою притекающим, со умилением и любовию припадающе, вопием прославльшему тя Богу: Аллилуиа.
Икос 10
Стена есте необоримая празднующим святую память вашу и всем притекающим к молитвенному покрову вашему, непостыдная надежда и крепкое заступление. Темже и нам, святии трие святителие, со умилением припадающим к вам, испросите у Престола Святыя Троицы милость и благодать во благовременную помощь, да с радостию и благодарением взываем вам:
Радуйтеся, милость и утешение всем верным являющии;
радуйтеся, кающияся грешники от сетей диавола избавляющии.
Радуйтеся, благодатных даров усерднии раздаятелие;
радуйтеся, всех человек предстательство и покрове.
Радуйтеся, сирых отцы и вдов заступницы;
радуйтеся, убогих богатство и болящих исцеление.
Радуйтеся, милосердия ко страждущим немолчнии проповедницы и юных наставницы;
радуйтеся, старец питателие.
Радуйтеся, сущих в скорбех утешителие;
радуйтеся, странных сопутницы.
Радуйтеся, изнемогающим поможение;
радуйтеся, чтущим память вашу радость и спасение низпосылающии.
Радуйтеся, трие святителие, велицыи и вселенстии учителие.
Кондак 11
Пение Пресвятей Троице паче иных принесли есте, святителие Божии, умом, словом, делом и богословным витийством вашим сплетения риторская разрушили есте, наставляюще ны почитати Троицу во Единице и воспевати Ей: Аллилуиа.
Икос 11
Светозарную троицу святых иерархов, Василиа, царствия тезоименитаго, Григориа, Богослова наименованнаго, Иоанна, Златоустаго учителя вселенныя, глубины Божия испытавших, восхваляюще и светлую память их благоговейно торжествующе, похвальная пения приносим таковая:
Радуйтеся, благознаменитыя трубы Божественных глаголов;
радуйтеся, цевницы богодухновенныя.
Радуйтеся, апостольских писаний богодухновеннии изъяснителие;
радуйтеся, апостольских преданий ревнителие.
Радуйтеся, дивная величия Божия всем земнородным поведающии;
радуйтеся, Славу Божию вашим житием и словом проповедавшии всей вселенней.
Радуйтеся, ко спасению добрии путеводителие и наставницы;
радуйтеся, растленных обычаев искоренителие, благих же нравов насадителие.
Радуйтеся, отрицатися плотских похотей и страстей научающии;
радуйтеся, врачеве премудрии недугов душевных и телесных.
Радуйтеся, церковная светила, от Трисолнечнаго Света возжженная;
радуйтеся, цветы благовоннии райскаго прозябения.
Радуйтеся, трие святителие, велицыи и вселенстии учителие.
Кондак 12
Благодать Божия обильно излияся во устах ваших, треблаженнии: вера православная вами укрепися, и мгла еретических шатаний и лжеучений светом ваших богодухновенных писаний отгнася. Темже, святителие, молитеся ко Христу Богу, да дух ревности вашея о вере и благочестии почиет и на нас, да сподобимся купно с вами пети Святей Троице: Аллилуиа.
Икос 12
Поюще и светло празднующе священную память вашу, треблаженнии Василие Великий, Богослове Григорие и Златоустый Иоанне, смиренно молим вас, не престайте молитися Христу о всех, верою призывающих вас и с любовию вопиющих таковая:
Радуйтеся, православных догматов хранителие;
радуйтеся, богословия живоноснии источницы.
Радуйтеся, верных сердца Божественне веселящии;
радуйтеся, яко неослабными подвиги вашими Арий низложися.
Радуйтеся, яко огнем богодухновенных вещаний ваших Евномиева ересь попалися;
радуйтеся, яко вашими богодухновенными глаголы Савеллиа ересь отгнася.
Радуйтеся, яко мудрование Нестора вами упразднися;
радуйтеся, о мире молитвенницы изряднейшии.
Радуйтеся, к Царствию Небесному верныя возводящии;
радуйтеся, Божии гласи, пречудно нам возгремевшии.
Радуйтеся, пастырей Церкве достоподражательнии образи;
радуйтеся, по Апостолу всем вся бывшии.
Радуйтеся, трие святителие, велицыи и вселенстии учителие.
Кондак 13
О святителие Христовы и отцы треблаженнии, Василие Великий, церковное светило и столпе непоколебимый, Богослове Григорие, уме богопросвещенный, архиерею превеликий, вкупе же и Златоусте Иоанне, покаяния твердый проповедниче, небесным спребывающе ликом и ангельским совокупльшеся силам, нынешнее приемше малое моление наше, испросите нам у Всещедраго Бога вышняя мыслити и деяти, да вечныя муки избегше, небесную жизнь наследим с вами, вопиюще Богу: Аллилуиа.
[Се́й конда́к глаго́лется три́жды.]
[Далее повторяем 1‑е икос и кондак:]
Икос 1
Ангели земнии и человецы Небеснии, святителие Христовы и отцы треблаженнии, поборницы Живоначальныя Троицы, от Нея светом трисолнечным осияваемии и молящиися непрестанно у престола Триипостаснаго Божества о душах наших, услышите ны от сердца к вам взывающия:
Радуйтеся, имущии дерзновение вопити о нас ко Господу;
радуйтеся, велицыи угодницы Святыя Троицы.
Радуйтеся, дарованьми единочестнии;
радуйтеся, апостолом единонравнии.
Радуйтеся, яко вашими ученьми дивно просия благодать Христова;
радуйтеся, разум свой в послушание веры пленившии.
Радуйтеся, блазии делателие винограда Христова;
радуйтеся, от юности Богом благословеннии.
Радуйтеся, скорби жития сего добре претерпевшии и данный вам талант приумножившии;
радуйтеся, волю Божию сильным мира сего со многим дерзновением благовестившии.
Радуйтеся, тьму нечестия отгнавшии;
радуйтеся, всю подсолнечную зарями догматов просветившии.
Радуйтеся, трие святителие, велицыи и вселенстии учителие.
Кондак 1
Избраннии светильницы Церкви Христовы, Василие, Григорие и Иоанне, ученьми вашими мир просветившии и вся шатания ересей и хульных смущения угасившии; яко ходатаи спасения нашего суще, молитвами вашими сохраните ны от всяких бед и вечных мук, да с радостию благодаряще вопием вам:
Радуйтеся, трие святителие, велицыи и вселенстии учителие.
